Tentsioa, tentsio handia sumatzen zen Eztala futbol zelaian Antzuola eta Anaitasunaren arteko lehian, bi taldeak zeuden eta atzeko postuetan murgilduta. Garaipenarekin –hirugarrena jarraian– gorago begira daude orain antzuolarrak.
Lehenengo zatian bigarrenean baino hobeto ibili zen Antzuola. Gola ez zen, hala ere, 34. minutura arte iritsi. Ezker hegalean, Auritz Guridik pase ederra sartu zion barrutik Josu Zubikarairi; honek lekua topatu, jaurti eta egin zuen gola. Atsedenaldia baino lehen beste aukera on bat izan zuen Zubikaraik berak, baina atezainak geratu egin zuen baloia.
zubikarai protagonista
Bigarren zatian ere Antzuolako ezkerra izan zen protagonista nagusia. Atezainaren aurrean bakarrik geratu eta lagunari pasea eman zion hala ere. Kontrario batek moztu zuen baloia eskuaz. Penaltia Mendizabalek jaurti zuen, baina Anaitasunako atezainak geratu. Handik lasterrera azkoitiarrek buruz-buruko jokaldia izan zuten beste atean, baina hauek ere ezin. Azken aukera Zubikaraik izan zuen berriro, baina baloiak zutoina jo zuen.