Pausoka guraso elkarteak urteko batzarra egin du eta ikasturte honetarako hainbat erronkaren eta egitasmoren berri eman zien gurasoei. Haurreskolaren eta eskolaren handitzea da Pausokaren erronka nagusietariko bat. "Antzuolan gero eta ume gehiago dagoenez, eskola eta haurreskola handitzeko prozesuan daude. Aurrerapauso batzuk eman dira: esaterako, hezkuntza delegazioa aurreproiektua egiten dabil eta, ezer zehaztuta ez badago ere, elkartekook zain gaude aurreproiektu hori jasotzeko eta aztertzeko", esan digu guraso elkarteko idazkari Nekane Berasategik.
Eskola eta haurreskola ez ezik, jangela ere txiki geratu da eta erabaki dute bigarren txanda martxan ipintzea. "Denak batera ez dira kabitzen jangelan eta txanden banaketa modu malguan egingo da, umeen erritmoa eta kopurua kontuan hartuta", dio Nekane Berasategik.
Olentzero eta ikastaroak
Olentzeroren kalejiraz ere egin zuten berba. Orain arte irakasleak arduratu dira Gabonetako Olentzeroren kalejiraz eta orain gurasoek antolatuko dute. Hortaz, Pausokatik gurasoak animatu nahi dituzte antolakuntzan parte hartzera.
Umeen heziketaz ez ezik, gurasoenaz ere arduratzen dira eta bi ikastaro antolatu dituzte: lehen sorospenen gainekoa eta teknologia berrien ingurukoa.
Pausokakoek, bestalde, eskertu egin nahi izan dituzte Eskola Kirolean entrenatzaile diharduten gurasoak.
Ikasturte berrirako batzordean ere izan dira aldaketak: sei lagun berri sartu dira, eta 12 kidek osatuko dute orain.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak