Alardeak izango duen aldaketa bat dantzei dagokiena izango da. "Dantzen ordena aldatu egingo dugu. Esan daiteke alardetik aparte egiten zela dantza orain arte eta aurten aparte izan beharrean alardearen barruan izango direla dantzak", azaldu du Valen Moñuxek, Mairuaren Alardea biziberritzeko taldean lanean diharduenak. Gainera, dantza berezia prestatu dute alardean egiteko. Dantza berri horrek bi musika pieza izango ditu: batetik, Antzuolako zortzikoa eta bestetik, bertsotako zati bat. Neskek dantzatuko dute dantza berria.
Musika pieza bi
Musikan ere aldaketak izango dira: Jose Ignazio Antsorenak idatzitako Antzuola izeneko lana joko dute; eta txistuarekin jotzeaz gain, Oinarin taldekoek dantzatu ere egingo dute.
Bestalde, Alfredo Gonzalez Chirlaque Bergarako Musika Bandako zuzendariak iaz idatzitako Antzuolako Mairuaren Martxa lanak hainbat aldaketa izango ditu. Iaz Bergarako Musika bandak jo zuen pieza; aurten, baina, txisturako egokitu dute eta Musika Bandak jo beharrean Antzuolako txistu taldeak eta Bergarako metal boskoteak joko du.
Segizioa, handiagoa
Azkeneko alardean mairuaren segizioa bost pertsonakoa izan zen; bada, aurten, segizio handiagoa izango du mairuak. Dagoeneko segizioa antolatuta dute eta entseguak ere hasi dituzte.