Lehenengo, kantuan jardungo dute Hizkuntza Musikaleko eta Ahots Teknika eta Koraleko 17 ikaslek Alberto Carreraren zuzendaritzapean. Pianoan lagun izango dute Amaia Urdangarin irakaslea. Good morning, Nere Herriko Neskatxa Maite, Oskorri taldearen bi abesti eta Peace, Peace, Peace abestuko dituzte.
Akordeoi taldea
Santiago Rosales antzuolarrak akordeoiarekin Touchenette abestia eskainiko du gero. Akordeoi taldeko beste kideekin batera Immer gleich eta Volkstanz piezak joko ditu ondoren. Ioritz Ondarrarek, Olatz Azkaratek, Uxue Egañak, Amaia Ruizek, Sonia Gonzalezek, Ane Loidik eta Leire Agirrek osatuko dute taldea.
Lide Madinabeitiaren eta Laura Friasen klarineteek, Maite Alberdiren biolinak eta Amaia Galarragaren biolontxeloak bat egingo dute hurrengo kantua eskaintzeko; London Derry pieza, hain zuzen ere. Akordeoien ostean, musika garaikide melodikoa joko du Jesus Mari Arriaranek Oboearekin.
Metal taldeak hartuko du ondoren lekukoa. Bergarako eta Antzuolako musikariek osatutako taldea da. Promenade from Pictures pieza joko dute saxofoiarekin Xabier Iparragirrek, Aitzol Gandiagak eta Lander Egañak; flautarekin Jon Matak; tubarekin Andoni Moñuxek, tronparekin Gorka Pratek; eta klarinetearekin Kepa Etxanizek. Azkenik Pantera Rosa joko dute Aitzol Gandiagak, Lander Egañak eta Miriam Morenok saxofoiarekin Kemen Bedialaunetaren esanera.