Abertis enpresa arduratu da TVErako eta kate pribatuetarako (Antena3, Tele5, Cuatro, La Sexta) transmisorea ipintzeaz, eta Itelazpi enpresa ETBkoaz.
Abertis enpresak amaitu ditu lanak eta kate horiek ikusten dira jadanik LTD bidez. Itelazpikoek, berriz, maiatz inguruan antenan obra txiki bat egin zuten, besteak beste, antenari altuera pixka bat eman nahian. Orain, antenan aparailu berezi bat ipintzekoak dira, eta urrian barrena egingo dutela esan digute Itelazpikoek.
Egokitzapenak antenistek
Behin Itelazpikoek antena gertu dutenean, Udalera jakinarazpena bidaliko dute handik herritarrei zabaltzeko; baita antenisten elkartera ere, jakiteko pasa daitezkeela etxez etxe egokitzapenak egitera.
Etxebizitza bakarretan ez da moldaketarik egin behar, antenek kate guztiak ipintzen dituztelako eta zuzenean sartzen direlako kateak. Etxebizitza blokeetan, aldiz, antenistari deitu behar zaio kateetan modulu txiki batzuk ipintzeko.
Bestalde, Itelazpitik esan digute Gipuzkoan apirilean egingo dutela itzalaldi analogikoa eta ordutik LTD bidez ikusiko dela telebista; hortaz, ordurako egokitzapena egina izatea gomendatu dute.