Eguzki auzoko gimnasioaren erabileraz eta kudeaketaz arduratuko den enpresa edo norbanakoa kontratatzeko dei egin du Udalak. Hain zuzen, deia buletin ofizialean argitaratzen denetik 20 egun izango dituzte interesatuek dokumentazioa udaletxean aurkezteko: zerbitzua emateko eta langileak kudeatzeko proiektua; instalazioen kudeaketa eta bideragarritasun plana eta azterketa ekonomikoa; tarifa proposamena; baliabide materialak; eta zerbitzu gehigarriak.
Gastuak, esleipendunaren esku
Erabiltzaileen kuotetatik jasotakoa izango da zerbitzuaren kudeatzailearen ordainsaria. Gastuez ere hark arduratu beharko du. Hau da, gimnasioa egongo den lokala utzi arren, materiala eta gimnasia aparailuak, mantenua, langileen soldatak… esleipendunak ordaindu beharko ditu.
Aurreikuspenen arabera, uztailerako egin nahi dute zerbitzuaren esleipena eta ikasturte berriarekin gimnasioa abian izatea da asmoa. Argibide gehiago udaletxean jaso daitezke.
