Dagoeneko, konpontzeko bidean dago arazoa. Batetik, argindar kaxa berria jarriko du Udalak Beheko auzoko kaleko argiteriarendako. Izan ere, gaur egun, frontoiko argindar kaxatik bideratzen da Beheko auzoko, Eguzki auzoko eta Zurrategiko kaleko argiteriarendako argindar guztia. Horrek gainkarga arazoak sortzen ditu.
Instalazioak, zaharkituta
Pedro Iturbe alkateak hauxe adierazi du: "Urte mordoan, kaleko argiteriaren kableatuan ez da ezer egin, eta zaharkituta geratu da; gainera, sistema berrantolatzeko beharra zegoen, izan ere, adituek esan digutenez, instalazioen erabilera ez dago ondo planifikatuta".
Eguzki auzoan, bestalde, Kalebarrengo zubia zabaltzeko lanek ere izan dute eragina; kable bat apurtu egin zuten, eta horrek eragin zituen arazoak. Kableatu hori berritu dute dagoeneko. Azkenik, Zurrategiko aberia bat konpondu duten arren, aberia txiki baten bila dihardute Udaleko arduradunek, horri ere konponbidea emateko.