Osoko bilkurak onartutako araudiaren helburua pertsona nagusiendako jangela zerbitzua erregulatzea da.
Pertsona autonomoentzat
Jangela zerbitzua pertsona nagusi autonomoentzat da; zehatzago esanda, etxean janak prestatzeko zailtasunak dituzten 60 urtetik gorako pertsona nagusiei zuzendutako zerbitzua da. Hala ere, Karmele Korta Gizarte Ongizate batzordeko teknikariak azaldu du: "Zerbitzua eman daiteke adinaren baldintza bete barik, eskatzailearen baldintzak kontuan hartuta". Baldintza da eskatzailea Antzuolako udalerrian erroldatuta egotea.
Aurrez zehaztuta
Erabiltzaileak jangela zerbitzua noiz erabiliko duen aurrez zehaztu beharko da. "Egunero, edo astean egun batzuetan... aurrez zehaztuta egongo da eskatzaileak noiz erabiliko duen jangela zerbitzua", dio Kortak. Gainera, kontuan hartuta pertsona nagusiei zuzendutako zerbitzua dela, pertsona bakoitzaren beharretara egokitutako menuak egingo dituzte. Esan bezala, bazkariak eta afariak emango dituzte.
Eguneko zentroa
Antzuolako eguneko zentroak lau erabiltzaile ditu gaur egun. Esan behar da, baina, Bergarako eguneko zentroa obretan dagoenez Bergarako 15 lagun Antzuolan daudela obrak bukatu bitartean.
Jangela zerbitzuarekin, Torresoroako eskaintza zabaldu gura du Udalak. Gainera, Karmele Kortak azaldu du beste zerbitzu batzuk ere jarriko dituztela martxan: besteak beste, aktibitate tailerrak eta aldi baterako egonaldiak.