Pilotalekuan argi barik geratu izanak ere ez zuen lortu pilota jaialdia iluntzea. Antzuolarrek ondo erantzun zioten deialdiari; eskuz binako partiduak ikusmin handia sortu zuen herrian, eta harmailetan batu zen jende kopuruak berretsi zuen hori. Eskuz binakoa baino lehenago, baina, Gipuzkoako Pala Txapelketan Olalde ordezkatu duten Zabalo-Manso eta Zabalo-Iturbek izan zuten jaialdia girotzen hasteko ardura (35-14), eta ondoren etorri ziren omenaldiak eta dantzak.
Ordurako, baina, antzuolarrak herriko lau pilotari ezagunenak ikusteko deseatzen zeuden. Galdera asko zeuden airean: pilota profesionala utzi eta gero Elkorok zelan erantzungo zuen, Mendizabalen eskuak eutsiko ote zuen –minduta dauka–, Berraondok ze maila emango zuen udatik jokatu barik egonda, eta gainera, berea ez den lekuan –atzean–; eta, beste horrenbeste Murua-ren gainean ere, horrek ere hilabeteak zeramatzan-eta jokatu barik. Bada, ikusleen gozamenerako laurek erantzun zuten ondo, oso ondo.