Irailetik hutsik dagoen bake-epaile lanpostua betetzeko deialdia egin du Udalak

Bake-epaile lanpostua hutsik dagoela eta Udalak deialdia egin du postu hori beteko duen pertsona eta ordezkoa aukeratzeko. Udaletik jakinarazi dutenez, iragarkia laster kaleratuko dute Gipuzkoako Aldizkari Ofizialean, eta interesatuek, argitaratzen den hurrengo egunetik hasita, 15 eguneko epea izango dute udaletxean eskariak aurkezteko.

Irailean geratu zen hutsik bake-epaile postua eta berria hasi bitartean Urretxuko bake-epaileak dihardu bi herrietan lanean.

Ezkontzen ardura

Bake-epaileak ez du lan jardun osoa bete beharko. Izan ere, eguen goizetan Antzuolan egon beharko da epaileekin duen hitzordua betetzeko, baina gainontzean berak antolatuko ditu lan orduak. Bestalde, ezkontza zibilez arduratu beharko da, baina horretarako ere aukeratutako bake-epaileak ipiniko ditu baldintzak.  

Udal Eraikinen garbitzailea

Bake-epailearena ez da azken aldian Udalak eskaini duen lanpostu bakarra. Izan ere, Udal eraikinak garbitzeko langilea oposizio-lehiaketa bidez  aukeratzeko deialdia ere egin zuen aurrez Udalak.
Jadanik kaleratu zen urriaren 3ko Gipuzkoako Aldizkari Ofizialean lanposturako onartutakoen eta baztertutakoen behin behineko zerrenda. Onartutakoak 21 lagun izan ziren eta sei baztertuak. Azken hauek zuzenketak egin ostean, azaroaren 5ean  izango da guztiendako azterketa teorikoa garbitzaile posturako, 10:00etan, Herri Eskolan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.