Antzuolako Udalak 2003ko urrian onartu zuen behin-behineko dokumentua, eta jendaurrean jarri zuten. Ordutik, ia lau urte pasatu dira. Atzerapen horren arrazoi nagusiak dira, batetik, ingurumen-inpaktuaren gaineko azterketa egin gabe zegoela eta, bestetik, erreka bideratzeko proiektuak eragindako aldaketak egin behar zirela.
Irizpide zehatzak
Plan Bereziaren helburuak dira, batetik, hirigune historikoa babestea eta zaintzea, eta, bestetik, hango bizilagunen bizi kalitatea eta eraikinen kalitatea hobetzea.
Plana oso zehatza da, eta irizpide zehatzak markatzen ditu eraikinei eta hirigintza gaiei dagokienez. Besteak beste, hiriguneko eraikin guztiak banan-banan aztertu eta bakoitzaren gaineko irizpideak markatzen ditu planak. Horrela, hainbat kategoriatan banatu dituzte eraikinok: babes berezia behar dutenak, babes ertainekoak, oinarrizko babesa behar dutenak eta hirigunearekin bat ez datozenak.