Antzuolar horien txirrinduzaletasuna ez da gaur goizekoa, baina "aurten hasi gara talde moduan irteten", diosku antolatzaileetako batek, Imanol Garmendiak. "Gabonetan egin genuen lehenengo batzarra, eta irteera antolatu genuen. Lehenengo egunean, 14 lagun batu ginen. Eguraldi txarra egin duenean, berriz, batzuetan bost, beste batzuetan hamar… denetarik egon da", diosku Garmendiak.
Domekero
Taldeko kideak domeketan batzen dira Altzarte okindegi parean, 09:30ean. Debaraino joaten dira, eta gero Arrasatetik buelta ematen dute; 80 bat kilometroko ibilaldia. Orain arte, beti ibilbide berbera egin dute. "Hotz egin du, eta beti buelta hori egin dugu; gero, eguraldi ona datorrenean, beste batzuk ere egingo ditugu", dio Garmendiak. Lehen norbera bere aldetik irteten zen, eta orain, ibilaldiok batera egiteko aukera dute.