Debagoieneko, Soraluzeko eta Zumarragako musika eskoletara kamiseten ereduak bidali dituzte eta herri bakoitzean zenbat behar dituzten dakitenean kamiseta denak eskatuko dituzte antzuolarrek.
Hiru motako kamisetak izango dira. Emakumeendako kamisetak bi koloretakoak (zuriak eta beltzak) eta Aitor Divasson eibartarrak egun horretarako propio egindako irudia kamisetaren barrenean izango duena; eta umeendako eta gizonezkoendako beste bi modelo urdinak eta beltzak eta irudia maukan dutenak. Kamiseta guztiak mauka motzekoak izango dira.
Musika eskoletan kamisetak banatzeaz gain, egunean bertan ere salgai ipiniko dituzte hamar euroren truke.
Trikizio arratsaldean
Kamisetak ez ezik, Debagoieneko Trikitixa Egunerako egitaraua ere ia gertu daukate antolatzaileek; azken ukituak ematea baino ez zaie falta eta horretan dihardute. Musika eskoletako trikitilariek jardungo dute herrian barrena trikiti doinuak zabalduz. Bestalde, aurreratu digute arratsalde parterako Trikizio taldearen emanaldia izango dela.