Azaldu dute herriko gazteen artean "harremana sendotu" eta aurrera begira elkarlanean proiektuak garatzeko asmoz, besteak beste, Gaztetxe berria, egin dutela jaia: "Antzuolako gazteek gazteondako egindako jaia da, aurrera begira ditugun proiektuen alde elkarlanean aritzeko gai garela ikustarazteko geure buruari eta baita herriari ere".
Tortilla patata lehiaketa
Jaia hasiko dute 11:30ean salda beroa eta tortilla patata lehiaketarekin. Lehiaketan parte hartzeko izena eman behar da Mox edo Arin tabernan, azaroaren 7a baino lehen. Osagaiak antolakuntzak jarriko ditu, baina materiala –sua, zartaginak...– norberak eraman beharko ditu. Gaztetxean izango da lehiaketa.
Ondoren bazkaria egingo dute pilotalekuan. Bazkarira joateko izena eman beharko da Mox edo Arinen. Aurreko urtean bezala, baba jana egingo dute.
Bertsoak eta kontzertua
20:30ean afari pasada egingo dute Gaztetxean Aitzol Barandiaran eta Unai Gaztelumendi bertsolariekin. Eta, 22:00etan, gaztetxean bertan kontzertua eskainiko dute Kasik eta Egurra ta Kitto taldeek eta erromeria ere egongo da.