Gabonetako kontzertua Juan Antonio Lizarralderen omenez

Anelkarren, herriko abesbatzaren eta hainbat koadrilen ekimenez Gabon kanten kontzertua izango da abenduaren 27an, 18:30ean, parrokian. Ekitaldian omenduko dute Brasilen bizi izan ostean herrian hil berri den Juan Antonio Lizarralde misiolaria.

Gabonetako kantu jaialdia urte batzuetako etenaren ondoren berreskuratzea erabaki zuen abesbatzak. Juan Antonio Lizarralde ere parte hartzekoa zen.


10-15 laguneko eta adin tarte ezberdinetako sei taldek jardungo dute. Talde bakoitzak bi abesti eskainiko ditu eta amaieran denek batera hiru kantu.

Lizarralderen lana eskertuz

Urtetan bidali dute laguntza Brasilera antzuolarrek, Juan Antonio Lizarralderen koadrilakoen bitartez lehenengo eta azken urteotan Anelkarretik. “Misiolari moduan lan pausatua egiten zuen. Urarekin zeukaten arazo gehien baina Juan Antoniok ura lortzen baino lan gehiago egin zuen hango jendeari ulertarazten eta erakusten elkarlanean, auzolanean gai izango zirela ura lortzeko”, azaldu digu Anelkarreko presidente Jabi Etxanizek.

Anelkarrekoek kontzerturako aurkezpen bat gertatuko dute irudiekin eta testuekin eskertzeko Lizarraldek egindako lana eta erakusteko antzuolarrei eurek emandako laguntza nora iritsi den eta zertarako erabili den. “Askok izaten duen zalantza da dirua iristen ote den, horregatik guk beti herritarren bitartez bideratzen dugu laguntza beharrean dauden herrietara”, dio Etxanizek.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.