Liburutegi berria zabaldu bitartean ezingo dira liburuak etxera eraman. “Frontoian obretan dihardutenez arratsaldeetan umeek ez dute egoteko tokirik. Hemen kaxa batean ipuinak daude, eta aldizkariak ere umeekin etortzen diren helduendako” esan digu liburutegiko Lierni Legorburuk.
Bien bitartean liburuak kaxetan batetik bestera eramaten eta liburutegi berriko apaletan ipintzen dihardute. Data zehatzik ipini ez badute ere, Lierni Legorburuk esan digunez, “Gabon aurretxoan Torresoroan egotea da gure nahia”.
Txikiendako gela itxia
Berrikuntzarik handiena liburutegi barruko banaketan izango da. “7 urtera bitarteko umeak itxitako gune batean egongo dira. Gaur egun denak batera egoten dira eta sekulako zarata sortzen da; hortaz, hori ekiditea da asmoa”, dio Lierni Legorburuk.
Bi ikasgela egongo dira talde lanak egin eta gainontzekoei trabarik ez egiteko. Gela hori erabiltzeko giltza eskatu beharko da. Beste toki bat ere egokitu dute modu goxoan irakurtzeko.
Kzgunea ere han egongo da eta orain liburutegian dagoen ordenagailua ere ipiniko dute.
Liburutegia goizez ere zabaltzea aztertzen dihardu Udalak. Orain arratsaldez bakarrik egoten da zabalik. “Liburutegian irakurtzeko ohiturarik ez du jendeak batez ere ordutegiarengatik. Egotera ume txikiak etortzen dira batik bat eta lanak egitera gaztetxoak”, dio Lierni Legorburuk.