Ohi bezala, Bidezko Merkataritzako produktuak salgai jarriko dituzte Anelkarreko kideek. Bestetik, Euskadiko Kutxak emandako opari sorta bat zozkatuko dute; hamar zenbakidun txartel sortak salduko dituzte zozketarako, bi euroren truke.
Oihulari Klown
Ekitaldi ikusgarriena, baina, izango da Oihulari Klown taldearen Otiacicoch kale antzerkia. Udaberriko Elkartasun Festarako ere ikuskizun hori eskaintzea aurrez ikusita zuten, baina, sekulako zaparradak bota zituela eta, bertan behera geratu zen. Hauteskunde egunean gertatu zen hori, maiatzaren 27an, hain zuzen ere. Domekan, 18:30ean hasiko da emanaldia eta kalez kale ibiliko dira.
Antzezlan probokatzailea da Otiacicoch. El Salvadorretik eta 1500. urtetik etorritako indigena talde bat osatzen dute aktoreek. Txundituta geratuko dira publikoan daudenen arroparekin, orrazkerekin... Hasieran, beldurtu ere egingo dira, baina, gero, jolasean hasi eta publikoa probokatu ere egingo dute.