Erloju berriak izango du zaharrarekin ezberdintasunik: batetik, bi esferaren ordez hiru izango ditu orain; Sagasti aldera ipiniko dute hirugarrena. Bestalde, diseinuari dagokionez, klasikoagoa izango da, hau da, ez du ez argi ez kristalik izango, esfera eta zenbaki erromatarrak baino ez.
Gainera, elizako erlojua kanpai txikiak jotzen hasiko da berriz. Egun, grabazio bitartez, megafoniatik entzuten dugu soinua, eta, hemendik aurrera, kanpai hotsa naturala izango da. Horretarako, erlojuarekin batera, kanpandorreko kanpai txikietan, mailu bat ipiniko dute ordulariari konektatuta, eta horiek izango dira, hain zuzen ere, aurrerantzean entzungo direnak.
Bigarren fasea
Elizako lanen lehen fasea ere amaitzear dago. Eliza azpiko etxearen erreteila egitea falta da, baina erlojua ipini artean ezin dira aldamioak kendu; hortaz, kanpoko lanak maiatzerako amaitzea espero dute. Bien bitartean, barruko obretarako aurrekontuak aztertzen dihardute. Barruan egin beharreko lanak hauek dira: pintaketa eta korua, zorua, argiteria eta soinua konpontzea. Erretaulak zaharberritzea azken lana izango da.