Udako kanpainan Bergarako eta Urretxuko igerilekuak erabiltzen dituzten antzuolarrei dirulaguntzak emango die Udalak. Beti ere, Lurraldebuseko txartel bakarra erabiltzen badute. Horixe onartu zuten eguaztenean egindako osoko bilkuran. EAJko zinegotziak abstenitu egin ziren eta gainerakoek alde bozkatu zuten. EAJko zinegotziek esan zuten ondo ikusten zutela proposamena, baina udako kanpaina hasita zegoela eta agian "beranduegi" zela. Gainera gogora erazi zioten alkateari Antzuolako kultur taldeei dirualaguntza murriztu dietela; baina, orain "beste laguntza batzuk" emateko dirua topatu dutela. Horregatik guztiagatik, abstenitu egin ziren.
Diruaren truke, bonoa
Udalak gehienez 8.000 euro bideratuko ditu dirulaguntzak emateko. Hortaz, partidako dirua agortzen denean ez dituzte eskari gehiago onartuko. Dena den, Pedro Iturbe alkateak esan zuen erabiltzaileek ez dutela dirurik jasoko: "Ez dugu dirua emango. Egindako bidaien arabera kalkulatuko dugu portzentajea eta dagokien diru kopuruarekin Lurraldebuseko txartela kargatzeko bonua emango diegu".