Antzuolako futbol zelaia da Soraluzekoarekin eta Alegiakoarekin batera Gipuzkoan belarrik ez duen zelai bakarra eta zelaia ez ezik ingurua ere berritu eta txukundu nahi dute. "Federazioan presidente aldaketa egon da eta Juan Luis Larreak esan du bere asmoetako bat dela hartxintxarrezko futbol zelaiak desagertzea, hori, guretzako positiboa da", esan digu Andoni Azkargorta kirol zinegotziak.
Aurre proiektua abian
Azkargortak azaldu digunez, "arkitekto bati eskatu genion aztertzeko futbol zelaia nola berritu zitekeen eta zein kostu izango lukeen. Ondoren federazioarekin ipini ginen harremanetan eta esan ziguten eurek diru zati handi bat horretara bideratzen dutela eta prest zeudela laguntzeko. Futbol zelaia berritzea gastu handia litzateke Udalarendako, hortaz, oraingoz aurreproiektua eskatu dugu eta horretan lanean dihardugu".
Berrikuntza asmoen artean daude atletismo pista txukuntzea, hesitura berritzea eta aldaketarik garrantzitsuena litzateke hartxintxarraren gainean belar artifiziala ipintzea.
Kirol zinegotziak esan digu oraindik zaila dela lanak egiteko epeak zehaztea: "Guk nahi genuke datorren irailerako, denboraldi berria hasten denerako, futbol zelai berria gertu izatea. Baldintza asko daude horren atzean: obren esleipena, federaziotik dirulaguntzak jasotzea...".