Aste Santu ondoren, apirilaren 14an, egingo du urteko batzar orokorra Antzuolako Erretiratuen Elkarteak. 18:00etan dute hitzordua, erretiratuek Zurrategi plazan duten egoitzan. Zuzendaritza batzordeko kideek bazkide guztiei egin nahi diete deialdia batzar orokorrean parte hartu dezaten.
Gai zerrenda
Honakoa izango da batzarreko gai zerrenda: 2006. urteko batzar orokorreko akta irakurriko dute lehendabizi; ondoren, 2006. urteko balantze ekonomikoa aurkeztuko dute; 2006. urtean egin dituzten ekintzak azalduko dituzte; gero, 2007. urterako ekintzen proposamena egingo dute; zuzendaritza batzordeko kideen erdiak aukeratuko dituzte eta, azkenik, galderak egiteko aukera egongo da.
Zuzendaritza batzordeko hiru kidek lagako dute euren kargua aurten: Andoni Azkarate presidenteak, Salbador Olabarria idazkariak eta Miren Arangurenek. Karmele San Sebastian diruzainari ere kargua lagatzea tokatzen zitzaion, baina, bere borondatez, lan horretan jarraituko du.
Hortaz, hiru kide berri aukeratu beharko dituzte batzar orokorrean, eta zuzendaritza batzorde berria osatutakoan, eurek erabakiko dute zein izango den presidente berria.
Bazkide berriak
Azkeneko hilabeteotan, Erretiratuen Elkartearen erronka izan da bazkide berriak egitea; eta horretan jarraituko dute; erretiratu guztiak animatu nahi dituzte bazkide egin daitezen.