Zale mordoa batu zen Estalan beteranoen arteko lagunartekoa ikusteko. Ikusmina piztu zuen herrian lehiak; batez ere, jokalari ospetsuak etorriko zirela iragarri zelako, besteak beste, Julen Guerrero. Baina, azkenean, Portugaletekoak ezin izan zuen Estalara etorri. Azken orduko beste konpromiso bat sortu zitzaion eta, zaleak Guerrero ikusteko gogoarekin geratu ziren.
Etorri zirenen artean, Imanol Etxeberria atezaina zegoen; hark, ama Antzuolakoa du. Hortaz, gogotsu ibili zen lehian.
Etxeko taldea aurretik
Partiduko emaitza gutxienekoa izan zen zapatuan; garrantzitsuena Xabier Barkerori egindako omenaldia izan zen. Antzuolako taldean, erregional mailan Barkeroren taldekide izandako jokalariak elkartu ziren; tartean, gaur egun oraindik ere jokatzen duten lau jokalari zeuden. Nagusienak, berriz, 42 urte zituen.
Hala, lehia ondo hasi zen etxekoentzat; Andoni Azkargortak, gaur egungo entrenatzaileak sartu zuen lehenengo gola. Berdinketa Joseba Agirrek egin zuen. Atsedenaren aurretik, Xabi Agirrek 2-1 aurreratu zuen etxeko taldea. Gero, aldagelatik bueltan, bilbotarrak nagusi izan ziren; Joseba Agirrek bigarrena egin zuen eta De Diegok sartu zuen hirugarrena.
Oroigarriak
Athletic-ek txapeldunaren oroigarria eta Udalak emandako herriko liburu sorta jaso zuen. Barkeroren senideek, berriz, Athletic-ek emandako koadro bat jaso zuten, jokalariek sinatutako kamisetarekin.