Udal ordezkariek eta herritarrek, elkarrekin, bost lantalde osatzea adostu zuten. Hiru izango dira nagusienak: programazioarekin lotutakoa; garraio eta aparkalekuen gaietaz arduratuko dena; eta hondakin eta logistika kontuei dagokiena.
Bilera horrekin udal ordezkariek udaletxe barruan egiten dabiltzan lana kalera atera eta herritarrekin konpartitu gura izan dute, antzuolarrek Mundumira euren jaia ere badela sentitu dezaten eta guztien artean emaitza hobea lortzeko.
Helburu berarekin, Kultura batzordekoek beste bilera bat egin dute gaur, martitzena; kasu honetan, tabernariekin eta elkarte gastronomikoetako ordezkariekin.
Mundumira jaialdian 20.000 lagun inguru espero dituzte eta, esan beharrik ez dago, kopuru altua dela hori Antzuola moduko herri batentzako. Sortu daitekeen arazo oro denboraz aurreikusi gura dute. Momentuz garbi dute, hori bai, oso garrantzitsua izango dela asteburu horretan Antzuolara joateko autobusa hartzea.