Muxikoen dantzaren berezitasuna da entseguetan hainbat urrats ikasi eta, saioan bertan, gidari lanak egiten dituenaren esanetara dantzatzen dituztela urrats horiek. Dantzariak goitik behera zuriz jantzita eta koloretako besoko batekin azalduko zaizkigu.
Kalejira eta saioa
Goizeko hamarretan, kalejira hasiko dute dantzariek; Muxikoen dantzariak eta sorgin-dantza egingo duten gizonezkoak ibiliko dira kalejiran, bakoitza bere aldetik. Hartza, tximinoa eta animalia-hezitzailea ere ibiliko dira, ohiturak agintzen duen bezala.
Gero, 12:30ean, Zurrategin elkartuko dira guztiak, dantza saioa eskaintzeko. Hantxe, umeek ere egingo dute dantza: txantxuak, sagar dantza, makil txiki, launakoa eta abar.
Orain dela hilabete hasi zituzten Muxikoak dantzaren entseguak; martitzenero elkartu dira ordutik, eta bihar izango dute azkena. Zapatuan, azkenik, entsegu orokorra izango dute.