Pozik azaldu ziren biak barikuko aurkezpenean, eta baita eskertuta ere, udalek, Eusko Ikaskuntzak eta Ugarteren familiak eurengan jarritako konfiantzagatik. Bekaren sustatzaileek, bestalde, bi neskek egindako memoriari darion sentsibilitatea azpimarratu zuten. Baita Ugarteren familiarekin duten gertuko harremana ere. Bost hilabete barru bukatuko dute lana.
Ahanzturatik berreskuratu
Jose Angel Zabalo Antzuolako alkateak azaldu bezala, "ahanzturara eroandako gauza bati bizitza ematea" da bekaren helburua, eta horretan Lizarra eta Antzuolako udalek elkarlanean jardun izanaren garrantzia azpimarratu zuen.
Lizarrako Udaleko ordezkariek ez zuten ekitaldian egoterik izan, baina bai Ugarteren senitarteko diren Navascues familiako hainbat ordezkarik. Haren bilobek aitaita zenaren figura ekarri zuten gogora Olaran etxean bertaratutakoen artean.
Antzuolako abesbatzak ere izan zuen lekua ekitaldian. DVDan Ugarteren salbea abesten entzun genituen. Gainera, musikariaren bi Gabon kantu aurkitu dituztela esan zuten, eta ikasten dabiltzala.
