Egurrezko zubia pieza bakarrean ekarri dute eta garabi batekin jarri dute dagokion lekuan. Zubia aurrefabrikatua izanik trailer handi batean Antzuolara ekarri eta goizean bertan amaitu dituzte muntaketa lanak.
Zubi berria kolatutako egur xaflaz egina dago (frontoian erabili zuten material bera), eta tratamendu berezia eman diote, kanpoan egonik eguraldiari aurre egiteko.
Beheko Auzoa lotzeko
Zubia oinezkoendako izango da eta hau ipintzeak erraztasunak emango dizkie Beheko Auzoko bizilagunei. Izan ere, aurrerantzean autoa laga ahal izango dute errekaren beste aldeko aparkalekuan eta zubitik auzora joan. Orain artean autoa auzoan aparkatzeko arazoak izan dituzte, leku gutxi dagoelako bertan.
Uzarraga eta Lizarraga arteko errepide berrian asteon jardun dute azken lanak egiten, eta pintaketak amaitutakoan, aurki bidea zabaltzeko asmoa dutela esan digute Udaletik.