Gaur, egubakoitza, San Juan bezperako ospakizunak izango dira. 19:30ean Oinarin dantza taldekoek eta txistulariek kalejira egingo dute. Plazara iritsita arbola jasoko dute 20:00etan eta ostean, lore lehiaketako sariak banatuko dituzte. 20:30etik aurrera San Juan zortzikoa eta soka dantza dantzatuko dituzte zuhaitzaren bueltan Oinarinekoek; eta amaitzeko sua piztuko dute Sagastiko parkean.
Kalebarren
Egubakoitz iluntzean, 20:00etan, hasiko dira Kalebarrengo jaiak ere. Trikiti doinuak izango dira protagonista trikitilari gazteek kalejira egingo dute eta 22:00etan Elustondo anai-arrebekin erromeria izango da Zurrategin.
Zapatua ere ekitaldiz betea dator. Goizeko 11:00etan marrazki lehiaketa egingo dute umeek eta 12:00etan ginkana; 13:00etan kalejira izango da trikitilariekin. Arratsaldean, 16:30ean hasita, haurrendako tailerrak egingo dituzte eta 19:00etan buruhandiak izango dira. Gauerako, arbola jasotzea dago iragarrita 20:00etarako, gero afaria eta ostean, disko jartzailea eta erromeria; gauerdian sagar dantza.
Domekan, txistularien goiz eresiaren ostean, meza izango da 11:30ean eta ondoren salda eta txorizoa banatuko dituzte. Eguerdian, 12:00etan "1, 2, 3... Iñaxito" umeendako antzezlana egongo da; eta jaiekin amaitzeko 16:30etarako umeendako jolasak antolatu dituzte.