Zerga eta tasa ia guztiak aldatuko dituzte eta igoeraren bat aplikatuko zaie, udalbatzarrak halaxe erabakita, 2006. urterako. Guztiak banan-banan aztertzea ezinezkoa denez, aipagarrienak azalduko ditugu jarraian.
Aldaketak zergetan
Zergei dagokienez, honako aldaketak izango ditugu. Ondasun higiezinen gaineko zergarekin hasiko gara: industriarako ez diren ondasunen kasuan, 2005eko tipoa %0,185 zen; 2006an izango da %0,19. Landa-lurrean dauden ondasunen tipoa ez da igoko.
Ibilgailuen zergei dagokienez, honakoa izan da erabakia: 14 zaldi fiskalera arteko ibilgailuen kasuan, %2,8 igoko dira zergak. Potentzia handiagoko ibilgailuen kasuan, gehiago igoko dira.
Tasetan ere aldaketak
Batetik, zabor bilketa eta errausketa zerbitzuari dagokion tasa daukagu; Mankomunitateak hartzen du horren gaineko erabakia: 2006. urterako, igoera izango da %17,6, eta etxebizitza bakoitzak urtean 60 euro ordaindu beharko ditu. Aurten 51 euro ordaindu dugu zerbitzu horregatik. Gainerako tasa gehienek aurrez ikusten duten Kontsumo Prezioaren Indizearen araberako igoera izango dute: %3,6, hain justu. Tasa horietako batzuk dira honakoak: agiriak luzatzeagatik ordaindu beharreko hainbat tasatan; negozioak zabaltzeko baimenak emateagatik; taxi lizentziagatik; hirigintza baimenak emateagatik; etxez etxeko zerbitzuagatik; frontoia erabiltzeagatik. Horiek guztiak dira aldaketetako batzuk.