Antzuolako Matz-Erreka S. Coop.-k lantegi berria ireki du Bergarako San Juan industria gunean bi milioi eurotik gorako inbertsioa egin eta gero. Pabilioiak 2.000 metro koadroko azalera du eta ate automatikoen negozioa eramango du hara Matz-Errekak. Ekainaren bukaeran izango da martxan.
Oinezkoendako ate automatikoen fabrikazio prozesu osoa egingo dute lantegi berrian, diseinutik hasi eta muntaiaraino. Hara eramango dituzte baita ere, negozioko gainerako sailetako bulegoak. Bestalde, egindako inbertsioaren zati bat erabili dute produkzio makinaria berritzeko eta komunikazio azpiegiturak hobetzeko, Josu Tornayk, negozioaren zuzendariak, azaldu duenez.
Leku handiaren beharra
Matz-Errekak automatismoak, finkatze elementuak, doitasunezko plastikoak eta oinezkoendako ate automatikoak egiten ditu. Azkeneko hori Bergarara eramateko arrazoi nagusiak bi dira, Tornayren esanetan: batetik, lehengaiak gordetzeko eta tratatzeko leku handiaren beharra, eta bestetik, negozioa hazi egingo delako aurreikuspena. Izan ere, halako ateak asko erabiltzen dira gune komertzialetan. Bestetik, gaur egun Antzuolan dituzten bi pabilioietan lekua berrantolatzeko aukera ere emango die eta negozioak zabaltzeko. 2004-2008 urte bitarteko Plan Estrategikoan jasotzen dutenez, bi dira hedatze nabarmenena izango duten negozioak, Erreka marka daramaten biak, hain zuzen: automatismoak eta ate automatikoak. Gaur egun 250 lagunek egiten dute lan Matz-Errekan; horietatik 28k oinezkoendako ate automatikoen negozioan jarduten dute.