Udalak hainbat proiektu ditu eskuartean: Sagastiko zelaian Gizarte Etxea eta Kultura Etxea egitea eta Beheko eta Eguzki Auzoen artean 50 etxebizitza eraikitzea.
Beheko, Eguzki eta Sagasti auzoetako bizilagun ugari eta hainbat herritar ez daude ados proiektuokin; ezta proiektu horien gaineko erabakiak hartzeko eta arauak aldatzeko aurrera eraman den prozesuarekin ere.
Gauzak horrela, urtarrilean sinadurak batzeari ekin zioten; guztira, 543 sinadura batu dituzte. Oraingo astean, martitzenean, sinadura horiek guztiak udaletxean aurkeztu dituzte. Sinadura horiekin bizilagunek zera eskatzen dute: Udalak eskuartean dituen proiektuen eta arau aldaketen prozesua bertan behera lagatzea eta horren gaineko eztabaida herrira zabaltzea. Era berean, arazoari adostutako irtenbidea topatzeko, batzar bat egitea eskatu diote Udalari.
Ekimenaren antolatzaileen esanetan, horrelako proiektu garrantzitsuak aurrera eramateko herritarren iritziak kontuan hartu beharko lituzke Udalak.