Egun bitxia izan zen egubakoitzekoa Patxirendako eta bere senitartekoendako. Goizean Amaia neskalagunarekin ezkontzekoa zen, eta halaxe egin zuen; baina, aurreko egunean jakin zuen arratsaldean aske geratuko zela, 3.000 euroko bermea ordainduta.
Eta halaxe gertatu zen; 19:00ak inguruan iritsi ziren Patxi, Amaia eta euren lagun eta senitartekoak Antzuolara. Hantxe, hainbat herritarren zorion agurrak jaso ondoren, ongi etorria egin zitzaion Patxiri. Dantzari batek aurreskua egin zion, eta Karmen Irizar presoaren alabak eta bilobak lore sorta bana eman zien Patxiri eta Amaiari.
Seguruena, apirilaren 9an, zapatua, egingo diote omenaldia Patxiri. Bere lagunek adierazi zuten jakinaraziko dutela eguna ziur zehazten dutenean.