Udalak prentsa ohar baten bidez gaitzetsi ditu herrian azken aldian izan diren pintadak. Bide batez, herritarrei eskatu die pintadak egiteari uzteko esanez, edozein herritar, talde politiko edo elkarteren eskura dauden bitartekoak erabiltzeko.
Idatziaren arabera, ekintza hauek ez dute inolako justifikaziorik eta guztion artean espresio bide alternatiboak aurkitu behar ditugu, arazo hauei aurre egiteko. Izan ere, pintadak garbitzeko azken lanek 10.000 euroko kostua izan zuten. Azken aldian egin direnak garbitzeko, berriz, 2.000 euro inguru gastatu beharko dituztela aurreikusi dute.
Herria garbi
Udalaren esanetan, guztiok nahi dugu herriak irudi erakargarri eta garbia izatea. Bizilagun guztiok ahalegin ekonomiko handia egin behar dugu Udalak garbiketa zerbitzu egokia edukitzeko. Udalak bestelako inbertsioetan erabil daitezkeen fondoak pintadak garbitzeko bideratzen ditu.
Gaineratu dute, pintada gehienak harrizko fatxaden gainean egin ohi dituztela, eta garbiketek kalte handiak eragiten dituztela balio arkitektoniko handia duten materialetan, produktu gogorrak erabiltzen baitira.