Orain arte futbol jokalariek eta Antzuola Kirol Elkarteko arduradunek bakarrik zuten Estalarako bideko eta futbol zelaiko argiak pizteko aukera.
Udalak, baina, aukera hori herritar guztiei zabaldu nahi izan die, eta horretarako, argiteria sistema berritu du.
Gauzak horrela, Estalarako bideko argiak piztu ahal izateko, hilerri ondoan jarri dute interruptorea. Sakatzen dugunetik 15 minutuz egongo dira farolak piztuta; ondoren, itzali egingo dira. Goitik behera etorri ahal izateko, berriz, futbol zelaiko aldagelen eraikinean, kanpoko horman dago interruptorea.
Futbol zelaian ere argiak
Estala futbol zelaiko bertako argiak pizteko aukera ere izango dugu aurrerantzean. Aldagelen eraikineko horman dago horretarako interruptorea ere. Estalako argiak bi orduz egongo dira piztuta; denbora hori pasatuta, automatikoki itzaliko dira futbol zelaiko farolak.
Era horretan, Udalak herriko kirolari eta paseoan ibiltzen diren guztiei futbol zelaia erabiltzeko aukera eman nahi izan die.