Zela sortu zen bi herrien arteko harremana?
Urbia inguruan, Aiherrako bi bikote oporretan ziren eta mendian zebiltzala, Antzuolako herritar batzuk ezagutu zituzten. Adiskidetu ziren eta euren arteko harremanarekin jarraitu zuten. Horrela, handik gutxira, Aiherrako gazte talde bati proposamena egin ziguten Antzuolara joateko, herria ezagutzera. Horrelaxe hasi zen, bada, gure arteko harremana.
Zelakoa izan da harreman hori urte hauetan guztietan?
Urtero-urtero egon gara aihertarrak Antzuolan eta antzuolarrak Aiherran. Antzuolaren kasuan, Udalak antolatu izan ditu hainbat ekitaldi; Aiherran, berriz, Beltzuntze elkarteak, Udalaren laguntzarik ez dugu eta izan.
Gure helburua beti izan da aihertarrok Antzuola eta Hegoaldea ezagutzea eta alderantziz, antzuolarrek Aiherra eta Iparraldea ezagutzea. Izan ere, herri bereko seme-alabak gara, hizkuntza bera dugu, nahiz eta hainbat desberdintasun izan. Horrela, hainbat irteera egin izan ditugu hemen antzuolarrekin eta baita Antzuola inguruan ere.
Ekitaldi ofizialez aparte, harreman pertsonalak ere sortu dira urte hauetan guztietan. Eta egubakoitzeko aurkezpen ekitaldian zenbat jende egon zen ikusita, iruditzen zait jendeak baduela gogoa harreman hauekin aurrera jarraitzeko.
Badirudi, baina, azkeneko urteotan epeldu egin dela harremana.
Bai, guk ikusten duguna da Antzuolako gazteek ez dutela interes handirik. Dena dela, 20. urteurreneko ospakizun hauekin, iruditzen zaigu elkarrekin lan eginez, elkar ezagutzeko aukera izango duela adin guztietako jendeak. Gainera, Euskal Herrian sinisten baldin badugu, nik uste dut horrelako urratsetatik hasten dela biharko Euskal Herria.
Aurrera begira ere harreman horrekin jarraitzeko, zer asmo dituzue?
Nahi duguna da urteurreneko ospakizunekin harremanak sendotzea; eta hortik abiatuta, elkarteen arteko harremanak sortzea, eskoletako umeen artekoak, bi herrietako mendi elkarteen artekoak, txirrindularitza zaleen artekoak eta abar.