Sorgin Dantza tradizionala da Antzuolan, eta horixe berpiztuko dute aurten ere, hilaren 22an. Meza ostean izango da hori. Aurretik, baina, herrian kalejira egingo dute, hartza, tximinoa eta domadorea lagun dituztela.
Honenbestez, honako egitaraua prestatu dute egun horretarako:
- 10:00etan: kalejira. Emakume taldeak eta Sorgin dantza taldekoek egingo dute.
- 12:30ean: dantza emanaldia Herriko Plazan. Umeen saioa, neskena eta Sorgin dantza egingo dituzte.
1885eko ohitura
Dirudienez, Nikomedes Letek irakatsi zien antzuolar batzuei Sorgin dantza. Goizean goiz irten eta baserriz baserri ibiltzen ziren txanpon edo sari bila. 1990ean berreskuratu zuen dantza Oinarin taldeak, eta hurrengo urtean atera zituzten hartza, tximinoa eta domadorea.
Tximinoa ez da Euskal Herriko beste inongo herritan agertzen. Hartzari dagokionez, ez dago jakiterik aratusteetan ateratzen den hartzak zerikusirik duen 1867an Laskurain baserri ondoan hil zutenarekin; gauza jakina da, ordea, hartz hura izan zela Gipuzkoan hil zuten azkena.