Anelkarrek Kongoko umeak laguntzeko kanpaina jarri du martxan

Anelkarrek Kongoko Kanzenia lurraldeko ahalik eta haur gehienei eskolara joateko aukera eman nahi die. Horretarako, datozen asteetan dirua bilduko dute Antzuolan. Laguntza nora bidaliko den ezagutzeko Kongoko argazkien erakusketa antolatu dute.

Hiru antzuolarrek gertutik ezagutu dute Afrikako Kongo herrialdean umeek bizi duten egoera. Andres eta Bittor Arbulu anaiak eta Jone Lete izan dira han aurtengo udaran eta hango berri ekarri diote Anelkar Antzuolako Elkartasun Taldeari. Anelkarrek hango umeak laguntzeko kanpaina jarri du martxan. Aste honetan hasita dirua bilduko dute herrian Kanzeniako umeei eskola ordaintzeko.

Kanzeniako ume bati urtebeteko eskola ordaintzeko 18 euro bakarrik behar dira. Anelkarrek laguntza eskatzeko gutunak banatuko ditu Antzuolako etxe guztietan eta dirua biltzeko kaxak jarriko ditu herriko denda guztietan. Antzuolarren laguntzarekin ahalik eta ume gehienei ikasketak burutzeko aukera eman nahi die Anelkarrek.

Kongo ezagutzeko argazki erakusketa

Antzuolarrek lagunduko duten lurraldea ezagutzeko Kongoko argazki erakusketa izango da asteburu honetan eta hurrengoan Olaranen. Argazkiak han egondako antzuolarrek egindakoak izango dira. Argazkiak laguntzeko, azalpenak emango dituzten panelak ere egongo dira. Erakusketaren ordutegia ondorengoa izango da: zapatuan 18:30-20:00, eta domekan 12:00-14:00 eta 18:30-20:00.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.