Koldo Goenaga, Elgetako Bilduko alkategaia: "Talde lanean dut konfidantza, denek izan behar dute lanerako aukera"

Zergatik dago Koldo Goenaga politikan?

Politika beti jarraitu dut gertutik. LABeko delegatua izan naiz urtetan. Orain, horrenbeste oztopo jarri dituztela ikusita, politikan zuzenean parte hartzea erabaki dut.

Zer eskaintzen dio Bilduk Elgetari?

Krisiarekin gauza gutxi egin daitezke, egia esan. Dirua ondo gastatuko dugu, beharrezko gauzetan. Etxekoandreen eredua jarraitu beharko dugu, dirua ondo administratu eta pixka bat gorde, egoera larriagoetan erabiltzeko.

Nola ikusten duzu zuk Elgetan? Zer falta zaio? Zer du soberan?

Elgeta oso ondo dago; Eibarrekin konparatuta zer esanik ez. Harreman ona dago herrian. Herri garbia da eta segurtasun aldetik, esaterako, segurua dela esan daiteke. Bestalde, industriagunea osatzea falta zaio, herri barruan ere badaude oraindik lantokiak, eta horiek herri barrutik industria poligonora pasa behar dira. Lantoki horiek dauden lurretan, berriz, berdegunea jarri nuke, adibidez, herriak oinezkoendako izan behar du. Modu horretan, egun duen bizi kalitate ona hobea izango litzateke.

Ze proiektu ditu Bilduk herrirako?

Lana egitea. Gaizki daudenak hobetzen saiatzea eta ondo daudenak ondo mantentzea. Promesak egitea erraza da orain, baina hankak lurrean izatea komeni da. Hala ere, industriagunera enpresa berriak ekartzera eta turismoa bultzatzea ideia batzuk dira.

Programaren ardatz nagusiak orain, labur bada ere.

Programa bera zehazten ari gara oraindik, egia esan. Hala ere, euskarak eta kulturak pisua hartuko dutela esan dezaket. Euskara mailan konturatu naiz umeek euskaraz ikasi arren, kalean ez dutela denek euskara egiten, eta hori zuzendu behar da. Kafe Antzokiak, bestalde, ikusi da ondo funtzionatzen duela, eta horrela jarraitu behar du, seinale ona da-eta. Etxebizitzei dagokionez, berriz, hutsak badaude herrian eta etxe premian ere bai herritar batzuk, beraz, aztertu egin beharko da gai hori.

Hala ere, taldeko lanean sinisten dut nik. Talde sendo bat behar da herria aurrera eramateko eta talde horretan guztiak sartzen dira, denak dira beharrezkoak. Denei eman behar zaie lanerako aukera.

Nolako Elgeta eta nolako elgetarrak gura dituzu ikusi lau urte barru?

Elgetar denak euskaraz berba egiten entzun gura nituzke. Espero dut lau urte barru krisia gaindituta egotea, eta herritarrak lana izatea. Bestalde, Elgetarako Euskal Herri osorako gura dudana nahiko nuke: Bilduren zerrendak aurrera egitea eta bakea lortzea Euska Herri osoarendako.