Bestalde, San Martin Agirre plazako urbanizazio proiektua idazteko, Errekaldeko lorategiko jauregiaren inguruan bide eta azpiegitura-antolamenduaren obra egiteko eta Zubietako zubia errehabilitatzeko Eusko Jaurlaritzari diru-laguntza eskaera bideratzea eta lanok aurrera eramateko konpromisoa hartzea onartu zuen udalbatzak aho batez.
Alkatearen esker ona
Ohikoa baino laburragoa izan zen bilkuran, Elena Lete alkateak esker on hitzak izan zituen hasieran: Aratusteetako kontzertuan parte hartu zuten herritarrendako, Martxoaren 8aren bueltako Berdinkatean zein Martxanterek edota Jardunek antolatutako ekitaldietan parte hartu zutenendako, Pol-Pol elkartearen 75. urteurrenaren bueltan egindako ekintzak antolatu zituztenendako eta domekako Natura Eguna posible egin zuten Pol-Pol elkartea, Lokatza Ziklismo Eskola eta Mendia Bizirik taldearendako.
Gueñes-Itsaso, iritzi ezberdinak
Gueñes-itsaso linea elektrikoaren inguruan iritzi ezberdinak dituzte Udal Gobernuak (EAJ eta PSE-EE) eta oposizioak (EH Bildu eta Irabazi). Gobernuak uste du, alkateak osoko bilkuran adierazi zuenez, proiektuaren trazadurak moldaketa batzuk behar dituela baina proiektuak onurak ekar ditzakeela. EH Bilduk eta Irabazik, berriz, uste dute ez dagoela linea horren beharrik, energia beharra "soberan" dagoelako asebetea.