Gero eta pertsona gehiagok egiten du ariketa fisikoren bat bere aisialdian eta joera honek eragina du kirolarekin lotutako enpresen hazkundean. Hori dela eta, kirol-enpresek eta diseinuko profesionalek elkarlanean dihardute aspalditik produktu eta zerbitzu berriak sortzen, eta diseinua abiapuntu hartuta, “sormenezko produktu eta zerbitzu berritzaileen bidez balio erantsia emateko ardura dugu, lehiakorrak izateko eta bezeroa zein erabiltzailea asetzeko”, adierazi dute Mondragon Unibertsitateko Diseinu Berrikuntza Zentrotik.
Azken hauek izan dira Design Konferentziak Mondragon ekitaldia antolatu dutenak, bertaratu direnei diseinuak kirol produktu eta zerbitzu berrietan eskaintzen dituen aukerak erakutsi eta diseinua enpresen estrategiaren osagai izatearen beharraz ohartarazi diete. Bertan izan dira Iñaki Herrero, Spiuk Sport Lineko industria diseinatzailea, Endika Zabala, Ixi Wood enpresaren sortzailea, Jokin Umerez, Ternua Groupeko zuzendari nagusia eta Gorka Etxabe, Artemaneko ikus-entzunezkoen produkzio zuzendaria.
