Eguraldi onak lagunduta, ezin gogotsuago atera dira Eskoriatzarrak gaur kalera mozorroa soinean. Batzuk ikusle moduan, eta beste batzuk berriz, mozorro desfilean parte hartzera, azken asteetan egindako lanaren emaitza izan diren karrozak erakutsi eta denetariko pertsonaien azalean sartzera.
Desfilean atera diren taldeen artean, dantzari eta musikariak ugari izan dira: Bollywood-ekoak, txaranga bat, salsa dantzari kubatarrak...
Bestalde, piraten barkua, zonbien kanposantua, 1 Formulako autoa, autobus magikoa... denetariko talde-mozorroak luzitu dituzte gaur eskoriatzarrek. Halaxe ibili dira kalerik kale, harik eta Herriko Plazara iritsi arte. Han, karrozak aparkatu eta festarekin jarraitu dute, DJ Motoren musikaz lagunduta.
