goiena.eus

Firefox 4 kalean da; azkarragoa bai, baina, berrikuntzarik?

  Teknologia
  • Atzoz geroztik deskarga daiteke Mozillaren Firefox nabigatzailearen bertsio berria, laugarrena, askoz azkarragoa eta, berritasun nagusi moduan, nabigazio-historia gailu eramangarrien eta ordenagailuaren artean sinkronizatzeko aukera ematen duena. Abiaduraz gain, urriak dira bestelako berritasunak eta asko dagoeneko hasi dira esaten Firefoxek galdu duela garai bateko erreferentzialtasuna berrikuntzei dagokienez.

12 beta bertsioren ostean etorri da definitiboa. Azeritxoaren nabigatzaileak Chrome 10a eta Internet Explorer 9arekin gura du lehiatu – biek ala biek berriki kaleratu dituzte bertsio berriak – eta, lehen kolpean, abiatzea askoz ere azkarragoa dela suma daiteke. Azelerazio grafikoa ere askoz lasterragoa da. Hala, testek Chromeren aurretik jartzen dute abiaduran baina Internet Explorer 9ren atzetik.

Itxura eta interfazea

Berritasun ala ezusteko gutxien dator Firefox berria alor honetan. Googlen Chromen itxura oso antzeko du eta fitxak helbide-barraren azpian kokatu dituzte. Interfazean ahalik eta elementu gutxien kokatzea izan da helburua. Hain zuzen, nabigatzaile guztien joera da diseinu ahalik eta sinpleena lortzea, botoi eta barren gainkarga, ahala den neurrian, saihestuta.

Gehigarriak

Horietxek izan dira Firefoxen arrakastaren giltza eta hemen ere errebisio bat egin dute eta aurrerantzean gehigarri berri bat atxiki ala eguneratzerakoan ez da berrabiarazterik beharko.

Berritasunak

Nagusienak eta hautemangarrienak bi dira: Panorama eta Do Not Track izenekoak. Lehenak aukera ematen du mihiak gaika antolatzeko. Bigarren aukera berriak nabigazio pribatua ahalbidetzen du.

Erantzunak

Erantzuna | #1

Mihiak? Urte mordoa darama Firefoxek euskaraz, eta denbora guzti horretan Pestaña "Fitxa" moduan itzuli da. Nondik atera duzue "Mihia" hori?

Erantzuna | #2

Kaixo Ibai,

Arrazoi duzu, "mihia" da Euskaltermek emandako hitza baina "fitxa" da Firefoxek erabiltzem duena.

Mila esker!

Erantzuna | #3

Bai, kasu batzutarako Euskalterm nahiko atzean geratu da...

Erantzuna | #4

Sarean irakurri dut Chrome kaleratu zenetik eta Microsoft-en softwarearen hobekuntza dela eta (Explorer izeneko birus hori) Firefox-en erabilera poliki poliki behera doala ordenagailuetan. Hala ere, nik uste dut oraindik ez duela erreferentzialtasunik galduko gehigarriak garatzen dituen komunitatea atzean duen bitartean...

Oraingoz gutxienez ni ez noa Suzko azeria aldatzera...

http://zuzeu.com/2011/03/21/euskalbar-39-firefo...
https://addons.mozilla.org/eu/firefox/

Erantzuna | #5

Nabigatzaileen artean lehia gogorra dator, agerikoa denez, baina badirudi, azeritxoari ez doakiola batere txarto. Hala, atzo bertan 24 ordutan bikoitza izan da Firefoxen deskarga kopurua (5 milioitik gora) Internet Explorer 9arekin alderatuta. Marka are ikusgarriagoa izan da, ikusita Microsoftek berak nabigatzaile berria ezagutzera emateko eginiko promozio zabala. firefox deskargatzeko orrian bertan kontagailu bat ipini dute eta geldiezin doaz zenbakiak gora eta, azken datuen arabera, %21etik gorakoa da dagoeneko Firefoxen kuota nabigatzaileen merkatuan. Arrakastaz hitz egin daiteke hortaz, bai.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa