Espainiako Kongresuak onartu egin zuen atzo 2005eko Tabakoaren Legea aldatzea; Senatuak egindako zuzenketa gehienak atzera bota eta duela bost urteko arauak onartzen zituen salbuespen gehienak kendu ditu. Aurreko legearekin jatetxe eta tabernetan erretzaileentzako guneak egokitu zituzten ostalariak nolabait saritzea ere baztertu egin du Kongresuak.
30 eurotik 600.000ra arteko zigorrak
Zigorrei dagokienez, urtarrilaren 2tik aurrera, Tabakoaren Legearen urratze arinak 30 eurotik gorako isunekin zigortuko dira, urratze larriak 10.000 euro artekoekin, eta oso larriak direnek 600.000 euroko isunak jasoko dituzte gehienez.
EAEn eragina bai; zigorrik ez, oraingoz
Atzo onartutakoa oinarrizko legea da eta, ondorioz, Hego Euskal Herrian ere eragina izango du urtarrilaren 2tik aurrera. Ordea, autonomia erkidegoei dagokie lege hori garatzeko eta betearazteko arauak onartzea. Eusko Legebiltzarra EAEn indarrean jarriko den legea lantzen ari da gaur egun, baina onartzen duen arte Eusko Jaurlaritzak ez du zigorrik jartzeko aukerarik izango.
Dena den, zigorrik jarriko ez duen arren, lege berriaren jarraipena egingo dutela gogorarazi du Gemma Zabaleta Eusko Jaurlaritzako Lan eta Gizarte Gaietako sailburuak, eta gaineratu Tabakoaren Legearen urratzeen salaketak jasotzeko "tresna guztiak" indarren jarriko dituela.
Bitartean, Eusko Legebiltzarrak aurrera jarraituko du legea onartzeko izapideekin. EAEko Tabakoaren Aurkako Legea ez da Eusko Jaurlaritzak nahi zuen bezain azkar onartuko, ordea; Espainiako legea indarrean sartzen zen egun berean ezartzeko asmoa zuen arren, 2011ko otsailera arte itxaron beharko du gutxienez.