Abiadura Handiko Trena egiteko lanen ondorioak egunerokoan ari dira pairatzen Angiozarren. Azken hilabeteotan etenik ez duen obra da, zarata handia eragiten duena egunez eta gauez, eta horrez gain, obrak hasi aurretik beti garbi egon den Angiozar erreka urte luzetarako zikindu dutela salatu dute. Atzo, martitzena, errekak kolore gris nabarmena zuela esnatu ziren bizilagunak eta argazkiak bidali zituzten komunikabideetara. Angiozarko alkate Mila Elorzak dioenez, egun batzuetan urak dagokion kolorea berreskuratu arren zikinkeria azpian geratuko da.
Araztegiak gainezka egin
Badira urte batzuk Angiozar Bailarako Batzarrak isurketak salatu ostean araztegi bat jarri zutela obretan. Horrek ahalbidetu du, Elorzaren arabera, egunerokoan isurketak nahiko kontrolatuta egotea baina euri apur bat egiten duenean gainezka egiten duela dio.
Jaurlaritzan, URA agentzian eta beste administrazio batzuetan jarri izan dituzte salaketak, azkena urtarrilean bertan isurketak eta obrek Goimendiko iturburua lehortu dutela salatuz, baina erantzuna beti izaten da antzerakoa.
Eta Angiozarko tarteko lanak noiz bukatuko ete diren galdetuta, itxaropen handirik ez dute bailaran.
"Eskaera txikien" aurrean, "hainbat oztopo"
Era berean, haserre daude Angiozarren eskaera txiki bat egiten dutenean hainbat oztopo jasotzen dituztelako, Madril eta Paris lotu nahi dituen proiektua egiteko dirua etengabe ari direla xahutzen baina gero beheko baserri bat goiko baserriko batekin lotuko duen bidexka bat egiteko arazoak besterik ez dituztela aurkitzen administrazioan.