Gipuzkoako Garraioaren Lurralde Agintaritzak astelehenean jakinarazi zuen, ordutik aurrera ezin dela patinete elektrikorik sartu Gipuzkoako garraio publikoan, "Mugi sistema osatzen duten ibilgailuetan bidaiatzen duten pertsonen segurtasun arrazoiengatik". Gipuzkoako Garraioaren Lurralde Agintaritzako lehendakariorde Azahara Dominguezek eman du horren berri.
Gaineratu du mugikortasun elektrikoko elementu horien bateriek eragindako suak, keak eta deflagrazio txikiek kalte fisiko zein material larriak eragin dituztela garraiobideen barruan, eta, beraz, erabaki hori hartu behar izan dutela nazioartean, Espainiar estatuan eta ondoren autonomia erkidegoetan izan den debeku korronteari jarraituz.
Fermin Iregi autobus gidaria eta LABeko komiteko ordezkaria ados dago indarrean sartu berri den debekuarekin: "Patinete elektrikoekin arriskua dago; txispa bat sortu daiteke eta autobusek berehala har dezake sua". Gogorarazi du auto gidariak aspaldi dabiltzala hori eskatzen.
Patinete erabiltzaile batzuek ez dute kontua hain garbi ikusi.
