Gipuzkoako Foru Aldunditik aditzera eman duenez, guztira 547.800 euro inguru bideratuko dituzte Eguneko Zentrora. Erguinen egongo da eta lokalean egin beharreko egokitzapen lanek 10 hilabete inguru iraungo dute.
Lokala
411 metro koadroko lokala izango da. Ekintza ezberdinak egiteko bi toki izango ditu, jangela, atsedena hartzeko gela handi bat, sukalde terapeutikoa, lan egiteko bi gela, komunak, biltegia eta instalazioen gela bat. Eraikinaren kanpoaldean igogailuaren funtzioa beteko duen plataforma bat ipiniko dute.
Langileak
Behin obrak amaituta, Diputazioak lehiaketa deituko du bere kudeaketaz nor arduratuko den erabakitzeko. Psikiatra, erizain, langile sozial, psikologo kliniko eta monitoreek jardungo dute bertan lanean. Gainera, Osakidetzaren osasun mentaleko zerbitzuen laguntza ere jasoko du zentroak.
Errehabilitazio kognitiboa, trebetasun sozialak, aisia, eguneroko ekintzetarako autonomia, auto-kontrola eta gorputz heziketa jorratuko dituzte, besteak beste, zentro berrian.
Gainera, zentroko langileek, buruko gaitz kronikoa duten pertsonen familiakoei arreta berezia eskainiko diete gaixotasuna hobeto ezagutu eta errehabilitazio pausuak ezartzeko.
Ordutegia
Goizeko 9:00etatik arratsaldeko 17:00etara zabaltzea da hasierako asmoa –jaiegunetan izan ezik- eta janari zerbitzua ere eskainiko dute.
Espero dute zentroak 2012 urtearen erdi aldera zabaltzea bere ateak.