0 eta 9 urte bitarteko haurrei zuzendutako azoka izan da eta umeek aukera zabala izan dute Olentzerori zer eskatu aukeratzeko.
Izan ere, toki askotako jostailuak egon dira ikusgai: aurreko urteetan legez, Ikastolen elkartea, Urtxintxa, Katxiporreta, Kometa eta Buruandiak taldeenak tartean. Bestalde, aurten, lehenengo aldiz, Oñatiko Txanda dendari elkarteak ere hartu du parte, beraz, Oñatiko dendetan dituzten jostailuak ere izan dira. Eta horretaz gain, Txaloka ludotekan bertan dituzten jostailuak ere izan dira erakusgai: jolas kooperatiboak, batez ere.
Zapatu eta domekan egon da irekita azoka goiz eta arratsaldez. Eta Txaloka ludotekatik esan digute pozik daudela lortutako emaitzarekin, jende asko hurbildu delako; batez ere, haur txikiak dituzten familiak. Eta jendea ere gustura geratu da, erakusketaz gain informazioa jasotzeko aukera ere izan delako: katalogoak eta euskarazko webguneen helbideak, besteak beste.