Urriaren bigarren hamabostaldian herriko dendetan erosketak pezetetan egiteko kanpaina egin zuen Txanda herriko dendarien elkarteak. Euren esanetan, uste baino diru gehiago batu dute. 530.000 pezeta baino gehiago.
Sari potoloak badu jabea
Hamabost egun horietan, erosketak Txandako dendetan egiteagatik, bi zenbakidun boletoak eman zizkieten dendariek erosleei. Boletoko zenbakia azaroak 17ko, zapatuko, loteria nazionalaren zenbakiaren berdina izanez gero, 1.250 euroko sari potoloa irabazten zuen erosleak. Eta Nagore Maisterreka eta Xabier Beitiak zuten boleto hori. Bikote honi Barue barne dekorazio dendan eman zioten boletoa eta eguazten iluntzean hartu zuten 1.250 euroko txekea.
Nagorek eta Xabierrek Txandako dendetan gastatu beharko dituzte 1.250 euro horiek, 2005eko urtarrilaren 31a baino lehen. Sari potoloarekin batera, 250 euroko beste bederatzi sari ere eman ditu Txanda elkarteak.