Hauteskunde kanpainaren azken txanpan sartu gara. Hiru egun besterik ez zaizkio geratzen hauteskunde kanpainari amaierara iristeko. Goizean EAJk ekitaldi politikoa egin du Oñatiko batzokian, eta bertan izan dira Jose Ramon Beloki kongresurako hautagaia, Xabier Albistur senaturako hautagaia, Gipuzkoa Buru Batzarreko presidente Juan Mari Juaristi eta Oñatiko alkate Andoni Gartzia.
EAJren helburua da Gipuzkoan ehun mila boto ateratzea
Euskadik hobetzen jarraitu behar duelako botoa eskatu die Albisturrek oñatiarrei. Gipuzkoan 100 mila boto lortu behar dituztela gogorarazi die alderdiko jarraitzaileei. Hiru diputatu eta beste horrenbeste senadore lortu nahi ditu EAJk. Juan Mari Juaristik esan duenez, EAJn oso lasai daude, gauzak ondo egin dituztelako.
Pintadak egin dituztenekin aspertuta
Oñatiko batzokiari pintadak egin dizkiote oraingo astean, eta pintadak egin dituztenekin aspertuta daudela gaineratu du Juaristik.GBBko presidenteak gaineratu du, PPk eta PSOEk ez dutela Euskal Herria defendatuko Madrilen.
Madrilen ahots propioa izateko eskatu dute botoa jeltzaleek, eta Ibarretxe plana aurrera eramateko. Oñatiko afiliatu eta alderdiko jarraitzaile dezente elkartu dira batzokian gaur goizean, eta segidan bazkaria egin dute.