"Sahara Marathon" dokumentala Kubako "Santiago Alvarez" jaialdian

A. Leibar 2004ko mar. 2a, 10:45
Irusoinek koproduzituriko "Sahara Marathon" dokumentala Kubako "Santiago Alvarez" V. Dokumentalen Jaialdian izango da. Aitor Arregik eta Jon Garañok idatzi eta zuzendu dute. Saharako maratoiaren bitartez, beren herrialdetik kanpo denbora luzez baldintza oso txarretan bizi diren sahararren giza-tragedia sinbolizatzen du dokumentala.

"Sahara Marathon" dokumentala, Irusoinek eta Moriartik koproduzitua, hautatua izan da Kubako Santiagon martxoaren 5etik 8ra egingo den "Santiago Alvarez in memoriam Jaialdiaren" V. ekitaldian parte hartzeko.

Saharar errefuxiatuak

Sahara Marathon 2003an Tindoufen (Aljeria) eginiko dokumentala da, saharar errefuxiatuen kanpalekuetan egina. Jon Garañok eta Aitor Arregik idatzia eta zuzendua, Saharako maratoiaren bitartez eta 55 minutuz, giza tragedia handi bat azaltzen digu: 250.000 saharar baino gehiagok 27 urte daramatzate beren herrialdetik kanpo bizitzera behartuta, egoera lazgarrian gainera.

Historiak Abdullah aurkezten digu, Saharako maratoian parte hartzeko gogoz prestatzen den gizona. 2003ko otsailean filmatu zuen zazpi kideko taldeak eta grabazioa betacam digitalean egina dago.

Lehiaketan izango da

Dokumental jaialdi honek badu lehiaketako atal bat ere eta horretarako hautatu dute "Sahara Marathon". Atal horretaz gainera aurkezpen bereziak izaten dira dokumental estreinatuak emateko. Kubako Jaialdiaren V. ekitaldi honetarako programatuak daude beste jarduera batzuk ere: hitzaldiak, argazki-erakusketa eta errealizadoreen topaketa.

Sahara Marathon-ek EiTBren partaidetza izan du eta Eusko Jaurlaritzako Etxebizitza eta Gizarte Gaietako Sailaren eta Donostiako eta Irungo Udalen laguntza.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak