Jendaurrean hitz egiteko zailtasunaren kontra, ikastaroak; udako jan-edanen ostean sabel inguruan pilatuta geratu direnak kentzeko, gimnasioa; haserrea kontrolatzeko, terapiak. Eta homosexuala izateari utzi gura dionarentzat, coach profesional baten laguntza.
Zerbitzu hori eskaintzen duen webgune baten kontrako salaketa jarri berri du Madrilen Arcopoli izeneko elkarteak. Elena Lorenzo Rego da zerbitzua eskaintzen duena; dio aldatzea erabaki askea dela, eta eskatzen dionari ematen diola laguntza. Eta, zoritxarrez, ez da kasu isolatua. Baina izatekotan, nork du arazoa? Homosexualak, edo arazoa duela sinestarazi dion gizarteak?